طريقه عمل شوربه السي فود

طريقة شوربة السي فوود
بتغسلي مكونات الطبق كويس بميه وشوي خل صغيرين... وبعدين يتغسلو بالميه بس ... ويتصفو ويتحط عليهم ملح وكمون وزنجبيل بودر ورشة جوزة الطيب وحبهان وورق لورا ( بالعدد علشان تشليهم قبل التقديم )... وفي الحلة تحطي معلقتين زيت درة ومعلقه زبدة .... وتشوحي بصله صغيرة متقطعه جوانح وتلات فصوص توم مفروم .... ويتشوحو وتبدأي تنزلي المكونات بالترتيب الكابوريا والكاليماري والسمك الفيليه والجمبري واخر حاجة الجندوفلي ..... وبين كل مكون والتاني دقيقة مثلا... ويتقلبو مع بعض..وبعدين تضيفي معلقة جزر مبشور وعود او تنين  كرفس متقطع صغير  وبعدين تضيفي علبة كريمة لباني ايطالي (حوالي نص كوباية للطبق النص كيلو)  او لبن عادي ... ويفضل اضافة شوربة جمبري بتعلي الطعم جدااااا وبتفرق خااالص في الطعم ( وهي عبارة عن قشر الجمبري بيتغسل بميه وخل وبعدين بيتحط في الميه وعليه بصل وتوم و ملح وكسبرة وكمون وزنجبيل بودر وحبهان وجوزة الطيب ومستكه ... وتتغلي لمدة ربع ساعه ... وتتصفا ... تبقى احلى شوربة تزودي بيها شوربة السي فوود )